Azərbaycan xalqımızın Ermənistandakı çoxəsrli tarixi olan mədəni və tarixi irsinin hazırkı vəziyyətinin qiymətləndirilməsi üçün UNESCO-ya müraciət edib. Bu barədə fevralın 8-də Report xəbər verib.
Belə ki, Azərbaycandakı Qeyri-Hökumət Təşkilatı tərəfindən görüş keçirilib. Görüş Ermənistandakı Azərbaycan xalqının irsinə qarşı bu ölkə tərəfindən həyata keçirilmiş mədəni soyqırımla bağlı UNESCO-nun Baş direktoruna müraciətin ünvanlanması ilə nəticələnib. UNESCO isə öz növbəsində Ermənistana və Azərbaycana missiya göndərməyi planlaşdırır.
Azərbaycan Mədəniyyət Nazirliyinin məlumatına görə, Ermənistanda yerləşən Göy məscid, Qala Məscidi, Şah Abbas, Təpəbaşı, Zal Xan, Sərtib Xan, Hacı Novruzəli Bəy, Dəmirbulaq, Hacı Cəfər Bəy, Rəcəb Paşa, Məhəmməd Sərtib Xan, Hacı İnam Məscidi kimi 300-dən çox məscid 20-ci əsrin əvvəllərində qəsdən dağıdılıb, özününküləşdirilib və ya digər məqsədlərlə istifadə edilib. Yalnız Dəmirbulaq Məscidi 1988-ci ilə kimi öz təyinatı üzrə fəaliyyət göstərib, indi isə o, tamamilə dağıdılıb və yerində çoxmərtəbəli bina inşa edilib.
